श्रीप्रसाद ओली स्मृति प्रज्ञान पुरस्कार डा. सुरेशराज शर्मा र राष्ट्रिय आविष्कार केन्द्रलाई

यस वर्षको श्रीप्रसाद ओली स्मृति राष्ट्रिय/अन्तर्राष्ट्रिय प्रज्ञान पुरस्कार २०८२ डा. सुरेशराज शर्मा र राष्ट्रिय आविष्कार केन्द्रलाई संयुक्त रूपमा प्रदान गरिने भएको छ। रुद्र–गौरी श्री अम्बिका ओली प्रतिष्ठानले उक्त निर्णय सार्वजनिक गरेको हो। पुरस्कारको राशि ५ लाख रुपैयाँ रहेको छ।

प्रतिष्ठानका अनुसार ८३ वर्षीय डा. शर्मालाई नेपालमा गुणस्तरीय प्राविधिक, व्यवसायिक तथा उच्च शिक्षाको विकास र विस्तारमा करिब पाँच दशकदेखि निर्वाह गरेको योगदानको सम्मानस्वरूप पुरस्कार प्रदान गर्न लागिएको हो। उनले विशेषगरी काठमाडौं विश्वविद्यालयको स्थापना र विकासमा सुरुदेखि नै महत्वपूर्ण भूमिका खेलेका थिए। उनी काठमाडौं विश्वविद्यालयका पूर्व उपकुलपति हुन्।

त्यस्तै, राष्ट्रिय आविष्कार केन्द्रलाई देश सुहाउँदो नवप्रवर्तनको संस्कृति विकास गर्न, युवा वैज्ञानिक तथा नवप्रवर्तकलाई प्रेरित गर्ने साझा मञ्च निर्माण गर्न तथा अनुसन्धान र स्वदेशी प्रविधि विकासको अभियानलाई अगाडि बढाएको योगदानको कदरस्वरूप सम्मान गर्न लागिएको प्रतिष्ठानले जनाएको छ।

प्रतिष्ठानका अनुसार प्रारम्भिक रूपमा राष्ट्रिय आविष्कार केन्द्रका संस्थापक महावीर पुनलाई पुरस्कार प्रदान गर्ने निर्णय गरिएको भए पनि उनले व्यक्तिगत रूपमा पुरस्कार नलिने अडान राखेपछि पुरस्कार केन्द्रलाई प्रदान गर्ने निर्णय गरिएको हो।

कृषि क्षेत्रमा योगदानका लागि एग्रो–मनाङ र डा. चुटराज गुरुङ सम्मानित

यसैगरी, यस वर्षको रुद्रप्रसाद ओली स्मृति राष्ट्रिय कृषि पुरस्कार एग्रो–मनाङ प्रालि र कृषि विज्ञ डा. चुटराज गुरुङलाई प्रदान गरिने भएको छ। पुरस्कारको राशि १ लाख १ हजार ११ रुपैयाँ रहेको छ।

प्रतिष्ठानका अनुसार एग्रो–मनाङ प्रालिलाई नेपालमा पहिलो पटक उच्च घनत्वमा स्याउ उत्पादनलाई प्रवर्द्धन गर्दै अग्रणी कृषकको भूमिका निर्वाह गरेको योगदानका लागि सम्मान गर्न लागिएको हो।

त्यस्तै, डा. गुरुङलाई वागवानी क्षेत्रमा अध्ययन–अनुसन्धान, हावापानी अनुकूल फलफूल उत्पादन प्रवर्द्धन तथा दक्ष जनशक्ति विकासमा पुर्‍याएको योगदानका आधारमा पुरस्कार प्रदान गरिने जनाइएको छ।

प्रतिष्ठानले पुरस्कार वितरण कार्यक्रम शनिबार पूर्व प्रधानन्यायाधीश खिलराज रेग्मीको प्रमुख आतिथ्यमा आयोजना गर्ने जनाएको छ।

प्रतिष्ठानले २०७८ सालदेखि यी पुरस्कारहरू वितरण गर्दै आएको छ। हालसम्म श्रीप्रसाद ओली स्मृति राष्ट्रिय/अन्तर्राष्ट्रिय प्रज्ञान पुरस्कारबाट २ जना, रुद्रप्रसाद ओली स्मृति राष्ट्रिय कृषि पुरस्कारबाट ११ जना, गौरादेवी ओली स्मृति राष्ट्रिय आदर्श आमा पुरस्कारबाट १० जना, अम्बिकादेवी ओली स्मृति राष्ट्रिय साहित्य तथा पत्रकारिता पुरस्कारबाट १० जना तथा देवी ओली स्मृति राष्ट्रिय बाल पुरस्कारबाट ११ जनालाई सम्मान गरिसकेको जनाएको छ।

प्रतिष्ठानका अध्यक्ष गंगाप्रसाद ओलीले वि.सं. २०८२ (सन् २०२५) का लागि यी पुरस्कारमार्फत विभिन्न क्षेत्रमा उल्लेखनीय योगदान पुर्‍याएका व्यक्तित्व तथा संस्थालाई सम्मान गर्न लागिएको बताए।

Follow @nagarik_news