ललितपुर महानगरपालिकाको सुझाव सङ्कलनका लागि छलफल सुरु

ललितपुर महानगरपालिकाले आगामी आर्थिक वर्ष २०८३/०८४ को नीति, कार्यक्रम तथा बजेट निर्माणका लागि सुझाव सङ्कलनका लागि छलफल सुरु गरेको छ ।

कार्यक्रमलाई सम्बोधन गर्दै ललितपुर महानगरका नगरप्रमुख चिरीबाबु महर्जनले गत वर्ष तय गरिएका करिब ९० प्रतिशत नीति, कार्यक्रम कार्यान्वयनको चरणमा रहेको बताउँदै आगामी वर्षमा महानगरले चक्रपथबाहिरका वडाको विकास, सम्पदा संरक्षण, स्मार्ट पूर्वाधार तथा घरदैलो स्वास्थ्य सेवालाई आगामी बजेटका प्रमुख प्राथमिकता अन्तर्गत राख्ने बताउनुभएको हो ।

उहाँले महानगरले सुशासनको अभ्यास अन्तरगत हरेक वर्ष सार्वजनिक सुनुवाइ, जनप्रतिनिधि, सल्लाहकार तथा सरोकारवालासँग परामर्श गरी नीति तथा कार्यक्रम तयार गर्दै आएकोमा यस वर्ष पनि स्थानीय र सरोकारोकारवालाहरुको सुझावलाई नीतिमा समेट्नको लागि छलफल सुरु गरिएको बताउनुभयो । महानगर प्रमुख महर्जनले महानगरमा पछि गाभिएका चक्रपथ बाहिरका वडामा विकासका पूर्वाधार तयार गर्ने विषयलाई आगामी बजेट तथा नीति कार्यक्रममा प्राथमिकतामा राख्ने योजना रहेको बताउदै चक्रपथ क्षेत्रमा स्मार्ट स्ट्रिट लाइट जडान गरिने जानकारी दिनुभयो ।

कार्यक्रममा महानगरपालिकाकी उपप्रमुख मञ्जली शाक्य बज्राचार्यले विकास पूर्वाधारका कामसँगै सम्पदा संरक्षण, संस्कृति प्रवद्र्धन र सामाजिक क्षेत्रलाई समान प्राथमिकतामा राखेर यस महानगरले सर्वाङ्गीण विकासतर्फ ध्यान दिएको बताउनुभयो । उहाँले पूर्खाद्वारा संरक्षित जात्रा, पर्व तथा सांस्कृतिक सम्पदाको प्रवद्र्धनका लागि पर्याप्त बजेट विनियोजन गरी अमूर्त सम्पदाको संरक्षण गर्ने योजना रहेको बताउनुभयो ।

प्रमुख प्रशासकीय अधिकृत रेखादास श्रेष्ठले छलफलमा सहभागी सरोकारवाला पक्ष, स्थानीय नागरिकका सुझावलाई आगामी आर्थिक वर्षको बजेट तथा नीति कार्यक्रममा समावेश गरिने बताउनुभयो । नेपाल काष्ठकला सङघका अध्यक्ष उपेन्द्र वाराहीले सिपले मात्र समृद्धि ल्याउने र स्वरोजगार बढ्ने तर्क अगाडि सार्दै महानगरले सिप, तालिमका लागि बजेट वृद्धि गर्नुपर्नेमा जोड दिनुभयो ।

उहाँले ललितपुरलाई हस्तकला नगरी घोषणा गरिएपछिका कुनै पनि कार्यक्रम सञ्चानल नभएको भन्दै हस्तकलाको सहरमा हुनुपर्ने गतिविधी अगाडि बढ्न नसकेकोले यसतर्फ ध्यान दिनुपर्नेमा जोड दिनुभयो । ज्यापूः समाजका अध्यक्ष सन्तमान महर्जनले ललितपुरका २२-२३ वटा जातिय खल पुचःले संरक्षण गरेर राखेका मूर्त-अमूर्त सम्पदा जात्रा, पर्वलाई लोप हुन नदिन महानगरले बजेट छुट्टयाएर प्रवद्र्धन गर्नुपर्नेमा जोड दिनुभयो ।

समुदायले चलाउँदै आएका र लोप हुने अवस्थामा पुगेका त्यस्ता सम्पदाको तथ्याङ्क सङ्कलन गरी संरक्षण र नेवा सङ्ग्रहालयमार्फत ललितपुरलाई पर्यटनको केन्द्रका रूपमा विकास गर्नुपर्नेमा जोड दिनुभयो । राजोपाध्याय समाजका अध्यक्ष सञ्जयराज राजोपाध्यायले ललितपुर महानगरको पहिचान, समुदायद्वारा संरक्षित कात्तिक नाचको व्यवस्थापनमा धेरै खर्च हुने भएकोले महानगरले पर्याप्त बजेट विनियोजन गर्नुपर्ने सुझाव दिनुभयो ।

नेपाल पत्रकार महासङ्घ ललितपुर शाखाका अध्यक्ष रामहरि कार्कीले चक्रपथ बाहिरका महानगर क्षेत्रको विकासका पनि बजेट छुट्टयाउन महानगरको ध्यानाकर्षण गराउनुभयो । चेम्बर अफ कमर्स ललितपुरका अध्यक्ष पुष्परत्न शाक्यले करदातालाई उपलब्ध गराइने सुविधा र सेवाको गुणस्तरमा पनि सुधार गर्नुपर्ने सुझाव दिँदै नियमित र धेरै कर तिर्ने करदाताको प्रोत्साहनका लागि महानगरले के व्यवस्था गरेको छ ? भनेर प्रश्न गर्नुभयो ।

महानगरले छलफलमा सहभागीको सुझावसहित सरोकारवालाले लिखितरुपमा दिएका सल्लाह, सुझावलाई समेत आगामी नीति तथा कार्यक्रम र बजेटमा समावेश गरी महानगरको चौतर्फी विकासमा ध्यान दिने प्रतिबद्धता जनाएको छ ।