हेल्थ टिप्स- पूर्वीय संस्कार व्रतोपवासमा लुकेको स्वास्थ्य विज्ञान

भोकै रहेर व्रत बस्ने परम्परा प्राचीनकालदेखि नै चलिआएको हो । केही वर्षअगाडिसम्म पनि यसलाई धार्मिक क्रियाकलापको रुपमा मात्र लिइन्थ्यो । तर यही व्रत अर्थात् उपवास क्रिया पश्चिमी मुलकमा पुगेर फास्टिङका नामले पुनः यहाँ भित्रिएपछि भने यसले बढी महत्व पाउन लागेको छ । आजकल धार्मिक आस्थाका लागि नभई शरीरको तौल सन्तुलनमा राख्ने र स्वस्थ रहने अभिप्रायले व्रत बस्नेहरु धेरै पाइन्छन् ।

जापानका डा. योसिनोरी असुमीले लामो अनुसन्धान गरेर २४ घन्टामा १६ घन्टा भोकै बस्दा मानवकोषहरुमा हुने फोहोर सफा हुने कुरा चर्चामा ल्याए । उनले यसबाट क्यान्सरसमेत निको हुन सक्ने बताएका छन् । अहिले नेपालमा समेत १६ घन्टे फास्टिङ भनेर धेरैले पानीबाहेक केही नखाई बस्ने गरेका छन् । यसरी व्रतोपवास बस्ने हाम्रो प्राचीन पूर्वीय संस्कारलाई जापानका डा. योसिनोरीले भनेपछि यहाँ धेरैले अवलम्बन गर्न थालेका छन् । यसलाई सकारात्मकरुपमा लिनुपर्छ ।