चालु आर्थिक वर्षमा पुँजीगत खर्च निराशाजनक, एक दर्जन मन्त्रालयले ३० प्रतिसत पनि खर्च गर्न सकेनन्

काठमाडौं । चालु आर्थिक वर्षमा ३० प्रतिशतभन्दा कम पुँजीगत खर्च गर्नेमा एक दर्जन मन्त्रालय छन् । यसमा सबैभन्दा कम पुँजीगत खर्च गर्नेमा संघीय मामिला तथा सामान्य प्रशासन (हाल भूमि व्यवस्था, सहकारी, संघीय मामिला तथा सामान्य प्रशासन) मन्त्रालय छ।

यस मन्त्रालयका लागि चालु आर्थिक वर्षमा पुँजीगततर्फ ७५ करोड ६२ लाख रुपैयाँ विनियोजन भएकामा २ करोड ३९ लाख रुपैयाँ मात्र खर्च भएको छ। अर्थात् विनियोजनमा ३.१६३ प्रतिशत मात्र खर्च भएको हो। ‘अहिलेसम्म मन्त्रालयको पुँजीगत खर्च कम देखिएको छ, यसमा दातृ निकायबाट आएको ६६ करोड रुपैयाँ स्थानीय तहमार्फत खर्च हुनुपर्ने र यसरी खर्च भएको रकम प्रणालीमा आइनसकेकाले कम देखिएको हो,’ मन्त्रालयका सहसचिव एवं प्रवक्ता एकदेव अधिकारीले भने।