अदालतको आदेशविपरीत मेनु मूल्यमाथि सर्भिस चार्ज र भ्याट

काठमाडौं — मूल्य अभिवृद्धि कर नियमावली–०५३ मान्ने हो भने सर्वसाधारणले रेस्टुराँमा ‘मेनु प्राइस’ बाहेक अन्य कुनै पनि शुल्क भुक्तानी गर्नुपर्दैन । तर तपाईंहरूले पक्कै होटल–रेस्टुराँमा ‘मेनु प्राइस’ बाहेकको रकम तिर्नुभएको छ । केही अपवादबाहेक धेरैजसो होटल–रेस्टुराँले सेवा शुल्क र भ्याट असुलिरहेका छन् ।

‘मूल्य भनेको सर्भिससहित सबै लागत जोडेर मेनुमा उल्लेख गर्ने हो । ऐन, कानुन र अदालतका आदेशहरूमा यो विषय प्रस्ट उल्लेख हुँदा पनि उपभोक्ता ठगिइरहेका छन्,’ उपभोक्ता हित संरक्षण मञ्च नेपालका महासचिव विष्णुप्रसाद तिमिल्सिनाले भने । सरकारी निकायले बिचौलियाको पक्षमा काम गरिदिँदा उपभोक्ता मारमा परेको उनको भनाइ छ ।