ट्रकको ब्लुबुकमा ‘अनुमतियोग्य जीभीडब्लु’ स्पष्ट उल्लेख गर्न सरकारको निर्देशन, ट्रक महासंघद्वारा स्वागत

काठमाडौँ । मालवाहक सवारी साधन, विशेषगरी ट्रक र ट्याङ्क ट्रेलरहरूको ब्लुबुकमा अबदेखि ‘अनुमतियोग्य कुल सवारी तौल (जीभीडब्लु)’ स्पष्ट रूपमा उल्लेख गर्न यातायात व्यवस्था विभागले सबै प्रदेशका यातायात कार्यालयहरूलाई निर्देशन दिएको छ। यातायात व्यवस्था विभागले जारी गरेको पत्रमा ट्रक तथा ट्रेलरहरूको भारबहन क्षमतासम्बन्धी अस्पष्टताका कारण नियमन र अनुगमनमा समस्या देखिएको उल्लेख गर्दै अबदेखि ब्लुबुकमा केवल कुल तौल मात्र नभई सवारीले कानुनअनुसार बोक्न पाउने वास्तविक भारबहन क्षमता स्पष्ट रूपमा उल्लेख गर्नुपर्ने व्यवस्था गरिएको छ।

पत्रअनुसार यातायात व्यवस्था ऐन, २०४९ को दफा १६ (उपदफा ३) तथा मालवाहक सवारी साधनको भारबहन नियमनसम्बन्धी निर्देशिका, २०७४ (संशोधनसहित) को अनुसूची–१ बमोजिम एक्सल, टेन्डम र ट्रिडमका आधारमा गणना हुने भारबहन क्षमता जोडेर ‘अनुमतियोग्य जीभीडब्लु’ का रूपमा ब्लुबुकमा स्पष्ट रूपमा लेख्नुपर्नेछ।