अपडेट: काभ्रेको बुचाकोट दुर्घटनामा ज्यान गुमाएका ८ मध्ये ४ जनाको पहिचान खुल्यो

काभ्रेको रोशी गाउँपालिका–७ बुचाकोटमा भएको बस दुर्घटनामा मृत्यु हुनेको संख्या ८ पुगेको छ। बनेपाबाट रोशी गाउँपालिकाको खार्पाचोकतर्फ जाँदै गरेको बा.३ ख ८३९८ नम्बरको बस दुर्घटनामा परेको हो।

जिल्ला प्रहरी कार्यालय काभ्रेका अनुसार मृतक ८ जनामध्ये हालसम्म ४ जनाको पहिचान खुलेको छ। पहिचान खुलेका मृतकमा रोशी गाउँपालिका–७ की ३४ वर्षीया फुलमाया तामाङ, वडा नं. ८ की ६० वर्षीया प्यारीमाया तामाङ, वडा नं. ६ का ७५ वर्षीय इन्द्रबहादुर लोप्चन र दैलेख घर भई नेपाली सेनामा अमल्दार रहेका ३० वर्षीय बमबहादुर भण्डारी रहेका छन्। बाँकी ४ जनाको पहिचान खुल्न बाँकी रहेको प्रहरीले जनाएको छ।