सरकारको 'छापामार शैली'ले तर्सियो निजी क्षेत्र : लगानीको वातावरण बिग्रिएको गुनासो

काठमाडौँ । सरकारले निजी क्षेत्रमाथि निरन्तर धरपकड र हतोत्साहित गरिरहेको भन्दै उद्योगी व्यवसायीहरू आक्रोशित र त्रसित बनेका छन् । सुशासन र लगानीको वातावरण बनाउने नाममा सरकारले आतङ्ककारी शैली अपनाएर व्यवसायीको मनोबल गिराउने काम गरेको उनीहरूको आरोप छ ।

सरकारले एकातिर लगानी वृद्धि गर्न र व्यवसायीलाई ढुक्क हुन आग्रह गर्ने तर अर्कोतर्फ अपराधीलाई जस्तो व्यवहार गर्ने दोहोरो चरित्र देखाएको व्यवसायीहरूले बताएका छन् । प्रक्रियागत बाटो नअपनाई, बिनाठोस आधार छापामार शैलीमा खानतलासी र धरपकड गर्दा मुलुकमा लगानीको वातावरण प्रतिकूल बन्दै गएको उनीहरूको भनाइ छ ।