आशंका त्यागी आत्मविश्वासी बनौं

आशंका आफैंभित्रबाट सुरु हुन्छ । अरूले गरोस् कि नगरोस्, आशंका मनबाटै अंकुरित हुनथाल्छ । आफू सिद्धिने वा अलगावमा पर्ने भनेको आशंकाकै कारण हो । आशंकाले सामाजिक जीवनमा दरार पैदा गर्छ । तर, आशंका मानिसको निकै प्रिय मनोवैज्ञानिक अस्त्र बनेर सबैको मनमा र मस्तिष्कमा सहजै बसिरहन्छ ।

आशंकाले घर गर्न थालेपछि दुःख कष्ट र दुर्भावनालाई तपाईंले आफूतिर आकर्षित गर्न थाल्नुहुन्छ । यो भनेको आफूमाथि कष्टको बोझ थोपर्नु हो । यस्ता निराशाजनक र शंकास्पद कुविचारले तपाईंको वरिपरिको वातावरणलाई पनि फोहर बनाउँछ । दूषित बनाउँछ । कुविचार तपाईंको मनमा संस्कार बनेर विराजमान हुन्छ ।