तरकारी, दुध र मासु बिक्री गर्न कृषि एम्बुलेन्स

गुल्मी । गुल्मीको सत्यवती गाउँपालिकाले कृषि एम्बुलेन्स सञ्चालनमा ल्याएको छ । गाउँमा उत्पादन भएका कृषिजन्य सामग्रीको बजारीकरण गर्ने उदेश्यले पालिकाले कृषि एम्बुलेन्स संचालनमा ल्याएको हो । एम्बुलेन्समा संघीय सरकारको १९ लाख र पालिकाको १५ लाख गरी कुल ३४ लाख लगानी छ ।

एम्बुलेन्स संचालनका लागि सबै वडामा उप–समितिहरु गठन गरिएको छ भने पालिकास्तरमा ‘थाप्ले सत्यवती कृषि बजार’ गठन गरिएको छ । सबै टोलमा संकलन केन्द्र पनि राखिएको छ । एम्बुलेन्सले कुल १५ क्विन्टलसम्म तरकारी बोक्न सक्छ । एम्बुलेन्समा माइनस १५ डिग्री र प्लस २५ डिग्रिसम्म तापक्रम कायम गर्न मिल्ने र पाँच दिनसम्म कुनै पनि तरकारी टिकाइराख्ने क्षमता रहेको कृषि शाखा प्रमुख उपकार भण्डारीले जानकारी दिए । एम्बलेन्सले तरकारी मात्र नभएर मासु र दुध पनि निर्यात गर्न सक्ने भण्डारीले जानकारी दिए ।