तीन युरोपेली राष्ट्रलाई सफलता

उत्तरी अमेरिकामा भइरहेको फिफा विश्वकप २०२६ को नकआउट चरणले सुरुदेखि नै रोमाञ्चक मोड लिएको छ। तीन युरोपियन राष्ट्र स्पेन, स्विट्जरल्यान्ड र पोर्चुगलले आआफ्नो चुनौती पार गर्दै अन्तिम–१६ मा स्थान सुरक्षित गरे। यी तीनै टोलीको जितको कथा फरकफरक रह्यो। कसैले इतिहास रचे, कसैले दशकौँ लामो प्रतीक्षा अन्त्य गरे भने कसैले अन्तिम क्षणसम्म चलेको तनावपूर्ण संघर्षमा विजय हात पारे। स्पेनले अस्ट्रियामाथि ३–० को सहज जित निकाल्दा टोलीका गोलरक्षक उनाइ सिमोन मुख्य आकर्षण बने। उनले लगातार ५१९ मिनेटसम्म गोल नखाई विश्वकप इतिहासमा सबैभन्दा लामो क्लिनसिटको नयाँ कीर्तिमान कायम गरेका छन्। यसअघि सन् १९९० मा इटालीका वाल्टर जेङ्गाले बनाएको ५१७ मिनेटको कीर्तिमान अब इतिहास बनेको छ।

सिमोनको कीर्तिमान व्यक्तिगत उपलब्धिमा मात्र सीमित छैन। स्पेनको सुदृढ रक्षापंक्तिले जारी विश्वकपमा अहिलेसम्म कुनै पनि टोलीलाई गोल गर्न दिएको छैन। अस्ट्रियाले पाँच पटक प्रहार गरे पनि एउटा पनि सट पोस्टभित्र राख्न सकेन। स्पेनका प्रशिक्षक लुइस डे ला फुएन्तेले आफ्ना गोलकिपर सिमोनको प्रशंसा गर्दै यो सफलता सम्पूर्ण टोलीको अनुशासित रक्षात्मक खेलको परिणाम भएको बताए। भ्यानकुभरमा स्विट्जरल्यान्डले पनि नयाँ इतिहास रच्दा अफ्रिकी राष्ट्र अल्जेरियामाथि २–० को जित निकाल्यो। स्विस टोलीले ८८ वर्षपछि विश्वकपको नकआउट चरणमा पहिलो जित दर्ता गरेको हो। यसअघि सन् १९३८ पछि स्विस टोलीले विश्वकपको नकआउट खेल जित्न सकेको थिएन। खेलको १२औं मिनेटमा ब्रिल एम्बोलोले अग्रता दिलाए भने दोस्रो हाफ सुरु भएको केही क्षणमै डान एन्डोयेले अर्को गोल थपे।