पिँजडाभित्रका सांसदहरू !

हिजो मात्र हामीले १६औं गणतन्त्र दिवस मनायौं । संविधान सभाबाट संविधान बनाउने र नेपाललाई एकतन्त्रीय राजतन्त्रात्मक शासन व्यवस्थाबाट गणतान्त्रिक राज्य व्यवस्था बदल्ने अभिप्रायसहित तत्कालीन माओवादीले गरेको १० वर्षे जनयुद्ध र नेपाली जनताको १९ दिने जनआन्दोलनका भरमा २०६५ जेठ १५ गते संविधान सभाको पहिलो बैठकबाट नेपालमा गणतन्त्र घोषणा भएको थियो । मौजुदा नेपालको संविधानले उक्त घोषणालाई संस्थागत गर्दै नेपाल संघीय गणतान्त्रिक राज्य व्यवस्था भएको उल्लेख गरेको छ । त्यसैको सम्झनामा हरेक वर्षको जेठ १५ गतेलाई गणतन्त्र दिवसका रूपमा मनाउने चलन छ ।

गणतन्त्रपछिको हाम्रो अवस्था कस्तो रह्यो ? त्यतातिर फर्कन पनि आज जरुरी भइसकेको छ । राज्य व्यवस्था फेरिए पनि पात्र फेरिएका छैनन् । उनै पात्र उही प्रवृत्ति पुनरावृत्ति भएको छ । यसले गर्दा लोकतन्त्र केही सीमित वर्गका लागि मात्र आएको अनुुभूति आमरूपमा गरिएको छ ।