कामना प्रकाशनसँग केही सम्झना–बिर्सना

२०५२ सालबाट पत्रकारिता आरम्भ गरेको एक वर्ष नबित्दै संयोगबस् म तत्कालीन आजको समाचारपत्र दैनिकमा जोडिन पुगेँ । नेपालभरि बजार विस्तारका क्रममा आजको समाचारपत्रका तत्कालीन महाप्रवन्धक विष्णुविक्रम गोंगजु र लेखा प्रमुख सरोज श्रेष्ठ उदयपुर जानुभएको थियो । त्यसबेला समाचारपत्रका तत्कालीन जिल्ला संवाददाता निष्क्रिय बसेका कारण मलाई जिल्लाबाट प्रतिनिधित्व गर्न अनुरोध गर्नुभयो ।

उदयपुरको गाईघाटबाट आजको समाचारपत्रमा जोडिने क्रममा म विकास पत्रकारितामा बढी सक्रिय थिएँ । नेपाल प्रेस इन्स्टिच्युटअन्तर्गतको क्षेत्रीय सञ्चार स्रोत केन्द्र विराटगरबाट विभिन्न आवधिक प्रशिक्षण लिई पत्रकारितामा सक्रिय भइरहेको थिएँ । यसै क्रममा २०५४ सालमा क्षेत्रीय सञ्चार स्रोत केन्द्र र युनिसेफ नेपालको संयोजकत्वमा सुरक्षित मातृत्व र पोलियो खोपका दुई फेलोसिपहरूमा म छनौट भएको । पूर्वाञ्चलका १९ जना पत्रकारहरूले पोलियो थोपाका विषयमा आम नागरिकहरूमाझ सचेतना अभिवृद्धिदेखि लिएर त्यसबारे आमनागरिकमा रहेको जानकारीका विषयमा रिर्पोटिङ गर्नुपर्ने थियो ।