तलब रोकिएपछि निगममा ट्रेड युनियनकर्मीले निर्देशकलाई थुनेर हस्ताक्षर गराए  

काठमाडौँ — नेपाल वायुसेवा निगमको संरचना बदल्ने सरकारको योजनाविरुद्ध जारी आन्दोलनका कारण दुई महिनाको तलब रोकिएपछि बुधबार तीन वटा (कांग्रेस, एमाले र माओवादी) ट्रेड युनियनले निगमका एक दर्जन बढी निर्देशक, उपनिर्देशकलगायत उच्च तहका कर्मचारीलाई कार्यालयमै ‘थुनेर’ तलब भत्ता निकासा गराउने निर्णय गराएका छन् । बैठकमा सहभागी संघका एक नेताका अनुसार, तलब खुवाउन ट्रेड युनियनले ४ बजे डाकेको निर्देशकहरुको बैठक राति ९ बजे सकिएको थियो ।

निगममा ट्रेड युनियनको ८३ दिनदेखि आन्दोलन जारी छ । आन्दोलनका कारण निगमले चालु आर्थिक वर्षको बजेट तथा वार्षिक कार्यक्रम तर्जुमा गरेको छैन । निगम १३ सय बढी कर्मचारीका लागि मासिक १० करोड रुपैयाँ हाराहारी तलब भत्तामा खर्च गर्छ ।