तेस्रो संस्करणको मारवाडी प्रिमियर लिग क्रिकेटको उपाधि गौरीशङ्कर हिर्टसलाई

पर्सा । तेस्रो संस्करणको मारवाडी प्रिमियम लिग क्रिकेटको उपाधि गौरीशङ्कर हिर्टसले जितेको छ । स्वर्गीय सुशील कुमार खेतानको स्मृतिमा वीरगन्जको आर्दश रङ्गशालामा आज भएको फाइनल खेलमा गौरीशङ्कर हिर्टसले अन्नपूर्ण टाइगर्सलाई सात विकेटले हराउँदै उपाधि जितेको हो । सुरुआती ब्याटिङ गरेको अन्नपूर्ण टाइगर्सले १५ ओभरको समाप्तिमा १० विकेट गुमाएर एक सय दुई रन जोड्न सफल भएको थियो ।

जवाफी ब्याटिङमा उत्रिएको गौरीशङ्करले १० दशमलव चार ओभरमा तीन विकेटको क्षतिमा लक्ष्य पछ्याउँदै उपाधि चुमेको हो । ग्रिन सिटी सामुदायिक केन्द्रका अध्यक्ष जयप्रकाश खेतान, समाजसेवी राजकुमारी खेतान, मारवाडी युवा मञ्चका अध्यक्ष अनुज रुगटा र पर्साका प्रहरी नायब उपरीक्षक राजु कार्कीले विजेता टोलीलाई नगद रु चार लाख, मेडल, प्रमाणपत्र र ट्रफी हस्तान्तरण गरे ।