लागूऔषधको सञ्जाल भत्काउँदै सिरहा प्रहरी

सिरहा : ठूलो परिमाणमा लागूऔषध गाँजा भारत तस्करी भइरहेको सूचना पाए लगत्तै इलाका प्रहरी कार्यालय लहानका डीएसपी कुमारप्रसाद मैनालीको कमान्डमा चेकजाँच टोली लहान नगरपालिका–१ स्थित ट्राफिक प्रहरी कार्यालय अगाडि कुरेर बस्यो। साउन ३० गते राति पौने ९ बजे को १ च ७५७७ नम्बरको एम्बुलेन्सलाई चेकजाँच भयो। त्यसमा ९० किलो लागूऔषध गाँजा र १ किलो १२० ग्राम ब्राउन सुगर फेला पर्‍यो। प्रहरीले एम्बुलेन्स चालक धनगढीमाई नगरपालिका–९ का सरोज लामालाई गाँजासहित पक्राउ गरी कारबाही चलाएको छ।

बरामद गाँजा धनगढीमाई–१३ भालुटारबाट एम्बुलेन्समा लोड गरेर ल्याएको पाइएको थियो। उक्त गाँजा भगवानपुर ठाडिनाका हुँदै भारत पुर्‍याउने उद्देश्यसहित ल्याउँदै गरेको प्रहरीको अनुसन्धानबाट खुलेको छ। गाँजा तस्करीमा प्रयोग भएको एम्बुलेन्स सुनसरी वराहक्षेत्र गुठीको नाममा दर्ता रहेको छ। एम्बुलेन्स लामाले आफ्नो जिम्मा लिएर चलाउँदै आएको प्रहरीको भनाइ छ। साउन २२ गते बेलुका प्रहरीले लहान–३ अस्पताल चौकमा होटेलबाटै लागूऔषधको कारोबार भइरहेको सूचना पाए। लगतै जिल्ला प्रहरी र इलाका प्रहरी लहानको संयुक्त टोली पुगे। त्यहाँका सगरमाथा होटेलबाट लागूऔषधसहित लहान–१ का ३० वर्षीय दिलीप साह र लहान–७ का २८ वर्षीय गोपाल दासलाई पक्राउ गर्‍यो।