सूर्य उपासनाको महापर्व छठ

महान् पर्व दसैं, तिहार सकिएलगत्तै तराई छठमय बनेको छ । विशेषतः मिथिला क्षेत्रमा छठ पर्वको रौनकले सबैलाई मोहित बनाएको छ । यस पर्वमा सूर्यको उपासना गरिन्छ । महापर्व छठको तयारी र उत्सवमा मिथिलावासी रमाइरहेका छन् । विधिवत रूपमा छठको व्रत बस्नुपर्ने हुन्छ । यस जीवनमा निरोगिता र आहार विहारको सौम्य र सम्यकताको विधान पनि हो ।

कात्तिक शुक्ल तृतीयाकै दिन व्रतालुले उसिना चामल, कोदो, मुसुरो, माछामासुसहित तामसी र राजसी भोजन परित्याग गर्छन् । ‘अरबा–अरबाइन’ विधि सुरुमा गरिन्छ । त्यसपछि निरामिष अर्थात् सात्विक भोजन तृतीयाकै दिन गरिन्छ । यी सबै सूर्यदेवको पूजा आराधनासँग सम्बन्धित छन् । तराईमा यसबेलामा जताततै सूर्यदेव र षष्ठी (छठी) देवीको महिमामा गीत गाउँदै गरिरहेको पाइन्छ ।