मन्त्रीको निर्णय ‘लत्याउँदै’ निमित्तका भरमा स्थानीय तह

काभ्रे । संघीय मामिला तथा सामान्य प्रशासनमन्त्री अमनलाल मोदीले निमित्त प्रमुख प्रशासकीय अधिकृतलाई हटाएर विकृति अन्त्य गर्ने घोषणालाई स्थानीय तहले लत्याइदिएका छन् । मन्त्रीको घोषणालाई केही स्थानीय तहले लिखित रूपमा नै अस्वीकृत गरेका छन् केहीले मौखिक कार्यान्वयन नगर्ने चेतावनी दिएका छन् ।

‘विभिन्न सञ्चारमाध्यमबाट प्राप्त जानकारीअनुसार यस नगरपालिकाका लागि अन्यत्रबाट प्रमुख प्रशासकीय अधिकृत खटाइएको भन्ने जानकारी सुन्नमा आएको सम्बन्धमा यस नगरपालिकामा हालसम्म कार्यरत प्रमुख प्रशासकीय अधिकृतबाट नै सन्तोषजनक रूपमा कार्यसम्पन्न भइरहेको अवस्था हुनाले नगरपालिकाको सहमतिबेगर कोही कसैलाई पनि सरुवा गरी नपठाइदिन हुन अनुरोध छ’, पनौती नगरपालिकाका प्रमुख रामशरण भण्डारीले भन्नुभएको छ– ‘नगरपालिकाको सहमतिबेगर कोही कसैलाई सरुवा गरी पठाएमा हाजिर नगराउने व्यहोरा अनुरोध गरिन्छ ।’