जुम्ली मार्सी चामलभन्दा फापरको पिठो महंगो

जुम्लाको चन्दननाथ नगरपालिका-७ की मीना महतले गत साता चार क्विन्टल फापरको पिठो बेचिन्। उनी आफूले कल्पना गरेको भन्दा राम्रो मूल्य पाएकोमा दंग परिन्। प्रतिकिलो २ सय रुपैयाँमै फापरको पिठो बेचेको उनले बताइन्। ‘जुम्लाको मार्सी चामल सबैभन्दा महंगो भन्थे। यहाँ त मार्सीभन्दा महंगो फापरको पिठो पो रहेछ,’ उनले भनिन्।

चन्दननाथ बहुउद्देश्यीय सहकारीले खोलेको अर्ग्यानिक मिनी मार्केटमा पिठो बेचेर ८० हजार रुपैयाँ बोकेर फर्किँदा उनले थाहा पाइन्, मार्सी चामलभन्दा फापरको पिठो झन्डै ८० रुपैयाँले बढी रहेछ। यहाँ मार्सी चामल प्रतिकेजी १ सय २० रुपैयाँले किनबेच भइरहेको छ।