प्रदेश प्रमुखलाई मुख्यमन्त्री कार्यालय लगेर गराइयो पोखरेलको शपथ

काठमाडौंः विवादका बीच लुम्बिनी प्रदेशका मुख्यमन्त्री शंकर पोखरेलले पद तथा गोपनीयताको शपथ लिएका छन्। प्रदेश प्रमुखको कार्यालयमा नेपाली कांग्रेस, नेकपा (माओवादी केन्द्र), जनता समाजवादी पार्टी (जसपा) लगायतका दलको गठबन्धनले विरोध गरेपछि प्रदेश प्रमुख धर्मनाथ यादवलाई मुख्यमन्त्री कार्यालय लगेर शपथ गराइएको हो।

आइतबार बिहान मुख्यमन्त्री पोखरेलले राजीनामा दिएका थिए। राजीनामा लगत्तै बसेको संसदीय दलको बैठकले सभामा तत्काल कायम रहेका सदस्य संख्याको आधारमा नेकपा (एमाले) को एकल बहुमत रहेको भन्दै पोखरेललाई मुख्यमन्त्री सिफारिस गरेको थियो। दलको सिफारिस अनुसार प्रदेश प्रमुख यादवले अपराह्न नै नियुक्ति गरेका थिए। तर, विरोधका कारण शपथ भने लम्बिएको थियो।