बागमती प्रदेश : सरकार विस्तारमा संघीयताको मर्म विपरीत केन्द्रकै भर

मकवानपुर । बागमती प्रदेश सरकार गठनको ८६ दिन पूरा भएको छ । यसबिचमा राजनीतिक समीकरण फेरबदल भएसँगै राप्रपा, नेकपा एमाले प्रदेश सरकारबाट बाहिरिएका छन् । सरकारलाई समर्थन गरेका दलहरु सत्ताबाट बाहिरिएपछि मुख्यमन्त्री शालिकराम जम्कट्टेलले संविधानअनुसार प्रदेशसभाबाट विश्वासको मत प्राप्त गरिसकेका छन् तर सरकारलाई पूर्णता दिने सवालमा कदम अघि बढाउन सकिरहेका छैनन् ।

राष्ट्रपति निर्वाचन अघि बनेको राजनीतिक समीकरण अनुसार नेकपा माओवादी केन्द्र, नेपाली कांग्रेस, नेकपा एकीकृत समाजवादी लगायतका दल सत्ता गठबन्धनमा छन् । यद्यपि प्रदेश सरकारलाई पूर्णता दिने सवालमा निकै ढिलासुस्ती भइरहेको छ ।