बुटवल–नारायणगढ सडक विस्तार बयानब्बे प्रतिशत सम्पन्न

राष्ट्रिय गौरवको आयोजना अन्तर्गत निर्माणाधीन बुटवल–नारायणगढ सडकखण्ड विस्तारको काम अन्तिम चरणमा पुगेको छ । चौथो पटक थपिएको म्याद सकिन डेढ महिना मात्र बाँकी छँदा पूर्वी र पश्चिमी दुवै खण्डतर्फ हालसम्म ९२ प्रतिशत भौतिक प्रगति भएको छ ।

२०७५ सालदेखि चीनको ‘चाइना स्टेट इन्जिनियरिङ कर्पोरेसन लिमिटेड’ ले ठेक्का पाएर सुरु गरेको यस ११३ किलोमिटर सडक आयोजनालाई दुई खण्डमा विभाजन गरी निर्माण भइरहेको छ । पूर्वी खण्डका सूचना अधिकारी इन्जिनियर शिव खनालका अनुसार यस खण्डको वित्तीय प्रगति ८५ प्रतिशत पुगेको छ । हालसम्म ६४ किलोमिटर सडक कालोपत्रे भइसकेको छ भने दाउन्नेको उकालो र पुलछेउछाउ गरी अब एक किलोमिटर मात्र कालोपत्रे गर्न बाँकी छ । यस खण्डमा पर्ने २२ वटा ठुला र १२ वटा साना गरी सबै ३४ वटै पुल निर्माण भई सवारी सञ्चालनमा आइसकेका छन् । हाल बजार क्षेत्रमा सर्भिस लेन, फुटपाथ, डिभाइडर र सडक मार्किङ (साइनिङ) को काम तीव्र गतिमा भइरहेको छ । मूल्यवृद्धिका कारण बिटुमिनको केही अभाव देखिए पनि आगामी साउन ८ गतेको म्यादभित्रै काम सक्ने लक्ष्य राखिएको छ ।

पश्चिमी खण्डका सूचना अधिकारी इन्जिनियर विकास खनालका अनुसार यस खण्डको वित्तीय प्रगति ८० प्रतिशत रहेको छ । कुल ४८ किलोमिटरमध्ये ४४ किलोमिटर सडकको काम सम्पन्न भइसकेको छ । यस खण्डका नौ वटा ठुला र २१ वटा साना गरी सबै ३० वटै पुल सञ्चालनमा आइसकेका छन् । मुख्य चुनौती रहेको दाउन्ने उकालोको बाँकी चार किलोमिटरमध्ये आधा सडक ढलान (आरसिसी) र आधा कालोपत्रे गर्ने योजना अनुरूप जेठ मसान्तभित्रै ढलान कार्य सकिने छ । बुटवल, भुमही र बर्दघाट जस्ता बजार क्षेत्रमा सर्भिस लेन तथा डिभाइडरको काम अन्तिम चरणमा छ भने दाउन्ने क्षेत्रमा हरियाली प्रवर्धनको कामसमेत भइरहेको छ । यस खण्डको म्याद आगामी साउन ५ सम्म रहेको छ ।

एसियाली विकास बैङ्क (एडिबी) को ८५ प्रतिशत ऋण सहयोगमा कुल १७ अर्ब ९९ करोड रुपियाँको लागतमा एसियाली राजमार्गको मापदण्ड अनुसार यो सडक विस्तार भइरहेको हो । सडक कालोपत्रे भएसँगै विगतमा धुलो र हिलोको सास्ती खेपेका स्थानीय बासिन्दा तथा यात्रुलाई ठुलो राहत मिलेको बर्दघाट नगरपालिकाका प्रमुख शम्भुलाल श्रेष्ठ तथा स्थानीय व्यवसायीले बताएका छन् । विगतमा बुटवलदेखि नारायणगढ पार गर्न सात घण्टासम्म लाग्ने गरेकोमा अब यो सडक पूर्ण रूपमा सम्पन्न भएपछि सो दुरी मात्र तीन घण्टामा तय गर्न सकिने आयोजनाले जनाएको छ ।