एसईईका पूरक परीक्षार्थीलाई निःशुल्क पढाउँदै काठमाडौं महानगर

काठमाडौँ — सप्तरीकी नेहा यादव गत असारमा सार्वजनिक एसईईको नतिजामा नन्ग्रेडिङमा परे पनि निराश छैनन् । किनकि काठमाडौं महानगरले सञ्चालन गरेको निःशुल्क तयारी कक्षा पढिरहेकी छन्, धेरै मिहिनेत गरेर पढेपछि ग्रेडवृद्धि परीक्षामा पास हुनेमा उनी ढुक्क छिन् ।

गणितमा एनजी अर्थात् नन्ग्रेड भएकी नेहाले बाहिर छुट्टै कोचिङ, ट्युसन खर्च तिरेर पढ्न महँगो पर्ने बताइन् । महानगरले एसईईको पूरक परीक्षा तयारी योजनामा स्रोत केन्द्रअन्तर्गत रहेको त्रिपुरेश्वरस्थित विश्व निकेतन माध्यमिक विद्यालयमा निःशुल्क शैक्षिक क्याम्पमा उनले कक्षा लिइरहेकी छन् । विश्व निकेतनमै कक्षा लिइरहेका रूपेश राई र पुकार राई महानगरले सञ्चालन गरेको यो क्याम्पले धेरै सहयोग गरेको बताउँछन् ।