ढोरपाटनमा पर्यटक सूचना केन्द्र स्थापना

बागलुङ । मुलुकको एक मात्र सिकार आरक्ष क्षेत्र ढोरपाटनमा पर्यटकको सहजताका लागि पर्यटन सूचना केन्द्र निर्माण गरिएको छ । बिवाइसी बागलुङअन्तर्गत दीगो पर्यटन प्रवर्द्धन परियोजनाको रु ७४ लाखको लागतमा पर्यटक सूचना केन्द्र स्थापना गरिएको हो ।

सूचना केन्द्रमा सिकार आरक्षका गतिविधि, सिकारको जानकारी तथा नाउर, झारल, रेडपाण्डालगायत जनावरको खाग तथा छालाका वस्तुका बारेमा जानकारी समेत राखिएको ढोरपाटन सिकार आरक्ष कार्यालयले जनाएको छ । कार्यालय परिसरमा उक्त पर्यटन सूचना केन्द्रको भवन निर्माण गरी सञ्चालनमा ल्याउने तयारी गरिएको जनाउँदै यसले पर्यटकलाई सही सूचना प्रदान गर्ने बिवाइसी बागलुङका सचिव विक्रम पौडेलले विश्वास व्यक्त गरे ।