१९ वर्ष मुनिको विश्वकप क्रिकेट : वेस्ट इन्डिजलाई हराउँदै आयोजक दक्षिण अफ्रिकाको विजयी शुरुवात

काठमाण्डौ – आईसीसी १९ वर्ष मुनिको विश्वकप क्रिकेटमा आयोजक दक्षिण अफ्रिकाले विजयी शुरुवात गरेको छ । समूह ‘बी’ मा दक्षिण अफ्रिकाले वेस्ट इन्डिजलाई ३१ रनले हराएको हो । जितका लागि २ सय ८६ रनको लक्ष्य पछ्याएको वेस्ट इन्डिज ४० ओभर १ बलमा २ सय ५४ रनमा अलआउट भयो । उसका जेवेल एन्ड्रियुलले शतकीय पारी खेले पनि टोलीलाई जिताउन सकेनन् ।

दक्षिण अफ्रिकाका क्वेना माफाकाले ५ विकेट लिए । त्यसअघि पहिला ब्याटिङ गरेको दक्षिण अफ्रिकाले निर्धारित ५० ओभरमा ९ विकेट गुमाएर २ सय ८५ रन बनाएको थियो । उसका डेवन मारिसले ६५ रन बनाए । वेस्ट इन्डिजका नाथन सेलीले ३ तथा नाथन इडवार्ड र डेशावन जेम्सले समान २ विकेट लिए ।