खस्किँदो खेलकुद

जबसम्म राज्यको नजर खेलकुदको सम्भावना र आफ्नो दायित्वप्रति खुल्दैन, एसियाली खेलकुदमा जस्तै अन्तर्राष्ट्रिय मञ्चहरूमा नेपालको शिर उठ्दैन।

चीनमा हालै सम्पन्न एसियाली खेलकुदमा आयोजक राष्ट्र नै चम्कियो। ३ सय ८३ पदक जितेर उसले विजेताको ताज पहिरियो। तर उसकै छिमेकी राष्ट्र नेपालको हालत भने भन्नलायक पनि रहेन। मात्रै दुई पदकमा सीमित बन्यो नेपाल। वास्तवमा यो लाजमर्दै स्थिति हो। भोकमरीले ग्रस्त र एकलकाँटे मुलुक उत्तर कोरियाको पनि यस्तो बिजोग छैन। ऊ त ३९ पदकका साथ उत्कृष्ट १० भित्रै पर्‍यो। नेपाल भने ३३औं नम्बरमा। दुई पदकमा पनि एउटा पनि स्वर्ण थिएन, एउटा रजत अनि अर्काे कांस्य। खेलकुदको मुख्य पात्र खेलाडी नै हुन्।