उद्योगमा सेनाको महत्वाकांक्षा

सरकारले लोकतन्त्रका लागि आत्मघाती कदम नचालोस्।

कुनै बेला बाँकेमा कपास खेती हुन्थ्यो। अचेल बन्द छ। परियोजनाको जमिनमा माओवादी रजाइँ छ। बुटवलको धागो कारखानाका औजारमा खिया लागेको छ। विराटनगर जुट मिलको गेट बन्द छ। गोरखकाली रबर उद्योग घस्रिन पनि नसकेर ठप्पै छ। अनि हेटौंडा कपडा कारखाना खण्डहर भएको छ। यी र यस्तै सरकारी स्वामित्वका रुग्ण र बन्द उद्योग चलाउने उपाय खोज्ने क्रममा नेपाली सेनाको जिम्मा लगाउने प्रसंग उठेको छ। हेटौंडा कपडा कारखाना सैनिक कल्याणकारी कोषमार्फत सञ्चालन गर्न सेना र सरकारबीच खासखुस चलेको छ। सेनाले माग्नु पनि हुँदैन र सरकारले दिनु पनि हुँदैन।