माछा बेचेर वार्षिक डेढ करोड आम्दानी

चितवनको खैरहनी नगरपालिका–१२ स्थित चिसाहानीका हरि अर्यालले १३ वर्षअघि माछापालन सुरु गर्नुभयो । साथीभाइले माछापालन गरेको देखेर अर्यालले पाँच कठ्ठा जमिनमा पोखरी खनेर माछापालन सुरु गर्नुभयो ।

सुरुवाती कठिनाइका बाबजुद, अर्यालले माछापालनलाई व्यावसायिक रुपमा विस्तार गर्नुभयो । पछि राम्रो हुँदै गएपछि उहाँले विसं २०७३ मा चार बिघा जमिन थपेर ६ प्रजातिका माछापालन गर्न थाल्नुभयो । अहिले, चार बिघा जमिनको जलासयमा माछा छन् । उहाँले वार्षिक रु डेढ करोडको माछा बिक्री गर्नुहुन्छ । खर्च कटाएर रु ७० लाख बढी नाफा हुने गरेको अर्यालले बताउनुभयो ।