मार्सी धानको बीउ बेर्नामा छरेर जुम्लामा मनाइयो धान दिवस

जुम्ला । मार्सी धानको बीउ बेर्नामा छरेर जुम्लामा २३औँ धान दिवस २०८२ एक कार्यक्रमका बिच मनाइएको छ । ‘जुम्लाको मूल्यवान् मार्सी धान, संरक्षण प्रवर्द्धन हाम्रो अभियान’ भन्ने नाराका साथ जिल्ला कृषि विकास कार्यालयको आयोजनामा बिहीबार कृषि अनुसन्धान केन्द्रको प्राङ्गणमा जुम्ली मार्सी धानको बीउ प्रदर्शनी, बीउको उपचार विधि र बीउ बेर्नामा छरेर धान दिवस मनाएको कृषि विकास कार्यालयका प्रमुख रामभक्त अधिकारीले जानकारी दिए ।

कर्णाली प्रदेश सरकारले जिल्लामा परम्परादेखि चैत १२ गते नै धानको बीउ घरमा भिजाउने दिनलाई वारुवाको दिवसका रूपमा मानी २०७७ साल जेठ १२ गते बसेको प्रदेश सरकारको मन्त्रिपरिषद्को बैठकले जुम्ला जिल्लालाई चैत १२ गतेको दिनलाई धान दिवस मनाउने भनी निर्णय गरेअनुसार यस वर्ष पनि प्रदेश सरकारको परिपत्रअनुसार कृषि क्षेत्रमा काम गर्ने जिल्लाका सरोकारवाला निकायको सहकार्यमा धान दिवस मनाएको कार्यालय प्रमुख अधिकारीको भनाइ छ ।