पोखरा पर्यटन: जलकुम्भीको विस्तारले फेवातालको बेहाल

माछापुच्छ्रे डुबुल्की मारेको मनमोहक दृश्य देख्न पाइने फेवाताललाई कुरुप बनाउने गरी जलकुम्भी झारले तालमा कहिलेदेखि प्रवेश पायो भनेर ठ्याक्कै भन्न नसके पनि जानकारहरू करिब चार दशकअघिदेखि यो झार तालमा देखिन थालेको सम्झन्छन्।

फुल्दा सुन्दर देखिएर तालको सौन्दर्य थप बढ्छ कि भनी मानिसले ल्याएर छाडेको होस् वा फिरन्ते चराहरूले बिस्ट्याएर तालमा प्रवेश पाएको होस् जलकुम्भी आज पोखरेलीहरूको टाउको दुखाइको विषय बनेको छ।