बुद्धिचाल महासंघमा फेरि विवाद

अध्यक्ष हेराकाजी महर्जन र महासचिव धरमबहादुर लामाविरुद्ध अविश्वास प्रस्ताव दर्ता भएसँगै नेपाल बुद्धिचाल महासंघभित्रको विवाद चर्किएको छ।

काठमाडौंमा मंगलबार आयोजित पत्रकार सम्मेलनमार्फत महासंघका वरिष्ठ उपाध्यक्ष दीपेन राईको नेतृत्वमा रहेको विद्रोही समूहले महासंघका अध्यक्ष महर्जन र महासचिव लामाविरुद्ध अविश्वास प्रस्ताव दर्ता गराएको जानकारी दिएको छ। विधानअनुसार साधारण सभाका कुल संख्याको एक चौथाइ (३० जना) ले महासंघका अध्यक्ष र महासचिवविरुद्ध अविश्वास प्रस्ताव ल्याउन पाउने व्यवस्था छ तर महासंघका ११८ जना साधारणसभा सदस्यमध्ये ४२ जनाले अध्यक्ष र महासचिवविरूद्ध अविश्वास दर्ता गराएका हुन्। सोही प्रावधानअनुसार २०८२ असोज १२ गते पहिलोपटक प्रस्ताव दर्ता गरिएको थियो तर अध्यक्ष र महासचिवले खेलाडीको माग र आन्दोलनलाई सम्बोधन गर्ने लगायत प्रतिबद्धता गरेपछि सो प्रस्ताव अगाडि नबढेको महासंघका उपाध्यक्ष धनबहादुर बोगटीले बताए।