दुर्घटनाको कारण अत्यधिक गति र ओभरटेक- यात्रु बस त्रिशूलीमा खस्दा ८ को मृत्यु, १६ घाइते

धादिङ । काठमाडौंबाट पोखरा हुँदै जोमसोङ जाँदै गरेको यात्रुवाहक बस धादिङको गजुरी गाउँपालिका–२ छहरेस्थित चिसापानीमा बुधबार दुर्घटना हुँदा ८ जनाको मृत्यु भएको छ । साँघुरो बाटोमा ओभरटेक गर्ने क्रममा अत्यधिक गतिमा गुडेको बस अनियन्त्रित भई दुर्घटना भएको थियो ।

प्रदेश ३–०१–००५ ख ९९५२ नम्बरको बस पृथ्वी राजमार्गबाट त्रिशूली नदीमा खसेर दुर्घटना भएपछि बसमा हाहाकार भएको थियो । झ्यालतिर भएकाहरू हामफालेर ज्यान जोगाएका थिए । केही महिलाहरू ढोकाबाट बाहिर लडेर पानीमा परेका थिए । दुर्घटना भएपछि केरा व्यापारी र मकै पोलेर बस्नेहरू तथा स्थानीयबासीले उद्धार गरेका थिए ।