न्यायाधीश सपना प्रधान मल्ल २० दिन बिदामा

काठमाडौं : न्यायाधीश सपना प्रधान मल्ल २० दिनका लागि बिदामा बसेकी छन्। सर्वोच्च अदालतका प्रवक्ता एवं सह–रजिष्ट्रार अर्जुन कोइरालाले न्यायाधीश मल्ल बिदामा बसेको जानकारी दिएका हुन्।

संवैधानिक परिषद्ले वरियताक्रम मिचेर चौथो नम्बरमा रहेका डा.मनोज कुमार शर्मालाई प्रधानन्यायाधीशमा सिफारिस गरेपछि मल्ल असन्तुष्ट थिइन्।

सर्वोच्च अदालतमा मल्ल पहिलो वरियतामा रहेकी छन् भने कुमार रेग्मी दोस्रो र हरिप्रसाद फुयाल तेस्रो वरियतामा छन्।

मंगलबार प्रधानन्यायाधीश नियुक्त भएका शर्माले सोही दिन राष्ट्रपति रामचन्द्र पौडेलसमक्ष पद तथा गोपनीयताको शपथ लिएका थिए। शपथ लिएलगत्तै शर्मा सर्वोच्च पुगेका थिए। सर्वोच्चमा प्रधानन्यायाधीशको स्वागत गर्न मल्ल उपस्थित भइनन्।

न्यायाधीश मल्ल मंगलबारसम्म कायममुकायम प्रधानन्यायाधीशको रुपमा काम गरेकी थिइन्।