व्यवस्थापनको लापरवाहीले टेलिकमको सेवा अवरुद्ध, निर्देशन नै टेर्दैनन् कर्मचारी

यही २०७९ माघ ३ गते दिनभर नेपाल दूरसञ्चार कम्पनी (टेलिकम) को सेवा अवरुद्ध भइरह्यो । करिब २ घन्टासम्म टेलिकमको सिमबाट फोन नलाग्ने, म्यासेज नजाने र फोन नआउने समस्या भइरह्यो । जसबाट टेलिकमका २ करोड १९ लाख (असोज मसान्तको तथ्याङ्क) सेवाग्राही पूर्णरुपमा प्रभावित बने ।

तत्कालीन समयमा टेलिकमका नेतृत्वसँग यसबारे बुझ्दा आकस्मिक रुपमा समस्या आउँदा सेवा अवरुद्ध भएको बनावटी जवाफ आयो । तर, यसबारे छानबिन गर्न गठित उच्चस्तरीय समितिले सार्वजनिक गरेको प्रतिवेदनअनुसार टेलिकमको नेतृत्वले चरम लापरवाही गर्दा पटक–पटक सरकारी लगानी रहेको नेपाल टेलिकमको सेवामा समस्या आइरहने गरेको निष्कर्ष निकालेको छ ।