चापाकोटमा बंगुर ओसारपसारमा प्रतिबन्ध

स्याङ्जा । स्याङ्जाको चापाकोट नगरपालिकाले बंगुर ओसारपसारमा प्रतिबन्ध लगाएको छ । चापाकोट नगरपालिका–९ स्थित एक व्यावसायिक फार्ममा ‘अफ्रिकन स्वाइन फिवर’ नामक रोग पुष्टि भएसँगै यसको रोकथाम तथा नियन्त्रणका निम्ति नगरपालिकाले चापाकोटबाट अन्यत्र ओसारपसार गर्न रोक लगाएको हो ।

घरपालुवा सुँगुर, बंगुर र जंगली बँदेल प्रजातिमा विषाणुका कारण लाग्ने उच्च मृत्युदर भएको खतरनाक महामारीजन्य अफ्रिकन स्वाइन फिवर रोग प्रयोगशालामा परीक्षणबाट पुष्टि भएको चापाकोट नगरपालिकाका प्रमुख प्रशासकीय अधिकृत नेत्रप्रसाद घिमिरेले बताए ।