काभ्रे बस दुर्घटना अपडेट : मृतकमध्ये ६ जनाको पहिचान खुल्यो

काठमाडौं । काभ्रेको बुच्चाकोटमा शुक्रबार दिउँसो भएको बस दुर्घटनामा मृत्यु भएका ८ जनामध्ये ६ जनाको मात्रै पहिचान खुलेको छ ।

बनेपाबाट काभ्रेकै सुँगुरे जाँदै गरेको बा३ ख ८३९८ नम्बरको बस दुर्घटना भएको थियो । बस अनियन्त्रित भई सडकबाट करिब ३०० मिटर तल खसेको जिल्ला प्रहरी कार्यालय काभ्रेले जनाएको छ ।

दुर्घटनामा ज्यान गुमाउनेमध्ये एक महिला र एक पुरुषको अझै पहिचान हुन सकेको छैन ।

प्रहरीकाअनुसार मृत्यु हुनेमा त्रिनेत्र दल गण भकुन्डेबेँसीमा कार्यरत नेपाली सेनाका अमल्दार दैलेख घर भएका ३० वर्षीय बमबहादुर भण्डारी, काभ्रेको रोसी गाउँपालिका-६ का ४५ वर्षीय मेघबहादुर तामाङ, सोही ठाउँकी ३४ वर्षीया फुलमाया तामाङ, ७५ वर्षका इन्द्रबहादुर तामाङ, रोसी ८ की ६० वर्षीया प्यारी माया तामाङ र सिन्धुलीको घ्याङलेक गाउँपालिका-४ की २२ वर्षीया सुमि तामाङ छन् ।

अन्दाजी ६० वर्षीय एक पुरुष र एक महिलाको सनाखत हुन बाँकी रहेको प्रहरीले जनाएको छ ।

दुर्घटनामा १६ जना घाइते भएका छन् । उनीहरूको उपचार धुलिखेल अस्पतालमा भइरहेको छ ।