सात दलीय गठबन्धनबाट एक्लियो प्रचण्ड सरकार, समर्थन फिर्ता लिँदै सरकारबाट बाहिरियो एमाले

काठमाडौं । सातदलीय गठबन्धन बनाएर गठन भएको प्रधानमन्त्री पुष्पकमल दाहाल ‘प्रचण्ड’ नेतृत्वको सरकार एक्लिएको छ । सोमबार नेपाल कम्युनिस्ट पार्टी ‘एमाले’ले समेत सरकारलाई दिएको समर्थन फिर्ता लिँदै सरकारबाट बाहिरिएपछि सरकारमा माओवादी एक्लो भएको हो ।

सोमबार गठबन्धनको मुख्य घटक एमालेको सचिवालय बैठकले सरकार छाड्ने निर्णय गरेपछि सरकारमा सहभागी एमालेका मन्त्रीहरूले प्रधानमन्त्री पुष्पकमल दाहाल प्रचण्डलाई राजीनामा बुझाएका हुन् । राष्ट्रपति पदको विषयमा सत्ता गठबन्धनमा कुरा नमिलेपछि सरकारको नेतृत्व गरिरहेको दल नेकपा ‘माओवादी केन्द्र’ले प्रतिपक्षी दल नेपाली कांग्रेसलाई राष्ट्रपतिमा सहयोग गरेर जाने निर्णय गरेको थियो । सोही निर्णयअनुसार सरकारको नेतृत्व गरिरहेको माओवादी केन्द्र, सत्ता साझेदार दल जनता समाजवादी पार्टीसहितका आठ राजनीतिक दलले संसद्को प्रमुख प्रतिपक्षी दल कांग्रेसका वरिष्ठ नेता रामचन्द्र पौडेललाई राष्ट्रपतिमा सहयोग गर्ने निर्णय नै गरेर पौडेललाई साझा उम्मेदवार बनाएका थिए ।