मेटलाइफ र ग्लोबल सिटिजनद्वारा 'फुटवर्क फर फ्युचर्स' सामाजिक सञ्जाल चुनौती

शिक्षा र खेलकुदमा बालबालिकाको पहुँच विस्तार गर्ने उद्देश्यसहित मेटलाइफ र ग्लाेवल सिटिजनले “फुटवर्क फर फ्युचर्स” नामक विश्वव्यापी सामाजिक सञ्जाल चुनौती सुरु गरेका छन्।

यो अभियान फुटबल थीममा आधारित छ, जसले इन्स्टाग्राम, टिकटक, फेसबुक, एक्स र लिंक्डइन जस्ता प्लेटफर्ममा फुटबल बललाई जुगल गर्दै छोटो भिडियो साझा गर्न प्रोत्साहित गर्छ। सहभागीहरूले भिडियोसँग #FootworkForFutures ह्यासट्याग प्रयोग गर्नुपर्नेछ।

कम्पनीका अनुसार, प्रत्येक योग्य भिडियो सबमिशनका लागि मेटलाइफले ५ अमेरिकी डलर योगदान गर्नेछ। यसमार्फत अधिकतम १ लाख अमेरिकी डलरसम्मको योगदान फिफा ग्लोबल सिटिजन एजुकेशन फन्डमा जानेछ, जसले विश्वभरका समुदायमा आधारित संस्थामार्फत शिक्षा र खेलकुद कार्यक्रमलाई सहयोग गर्छ।

यो पहल मेटलाइफ फाउन्डेसनको ९ मिलियन अमेरिकी डलर प्रतिबद्धतामा आधारित फिफा ग्लोबल सिटिजन एजुकेशन कोषसँग जोडिएको हो। सो कोषले बालबालिकाका लागि गुणस्तरीय शिक्षा र खेलकुद पहुँच विस्तार गर्ने कार्यक्रमहरूलाई सहयोग गर्दै आएको छ।

मेटलाइफकी ग्लोबल सस्टेनेबिलिटी प्रमुख तथा मेटलाइफ फाउन्डेसनकी अध्यक्ष नुरिया गार्सियाले यो अभियानले फुटबलप्रतिको विश्वव्यापी आकर्षण र शिक्षाको शक्तिलाई जोड्ने बताएकी छन्। उनका अनुसार, यो अभियानले युवाहरूमा आत्मविश्वास विकास गर्न र समुदायलाई सशक्त बनाउन सहयोग गर्नेछ।

अभियान मे १२ देखि जुलाई १९, २०२६ सम्म वा निर्धारित कोष लक्ष्य पूरा नभएसम्म सञ्चालन हुनेछ। सहभागीहरूले आफ्ना भिडियोमार्फत व्यक्तिगत वा समूहमा भाग लिन सक्नेछन्, तर भिडियोमा सुरक्षित र जिम्मेवार रूपमा फुटबल बल जुगल गरिएको स्पष्ट देखिनुपर्ने नियम राखिएको छ।

ग्लोबल सिटिजनले अभियानका नियम पालना नगर्ने वा मापदण्ड पूरा नगर्ने भिडियोहरूलाई अयोग्य घोषणा गर्ने अधिकार सुरक्षित राखेको जनाएको छ।

सम्बन्धित विषय:

# टिकटक

# फेसबुक

# खेलकुद

# शिक्षा