पोखरामा भएको विमान दुर्घटनामा हराइरहेका एक जना अझै फेला परेनन्, खोजी चल्दै

कास्की – कास्कीको पोखरा महानगरपालिका–१५ नयाँगाउँको सेती नदी खोँचमा भएको विमान दुर्घटनामा हराइरहेका एक जना अझै फेला पर्न सकेका छैनन् । बेपत्ता एक जनाको खोजी कार्य निरन्तर रहेको नेपाली सेनाले जनाएको छ ।

माघ १ गते पोखरामा भएको विमान दुर्घटनामा ज्यान गुमाएकामध्ये हिजो बेलुकासम्म ७१ जनाको शव फेला परेको छ । हिजो थप एक जनाको शव भेटिएको थियो । एक महिलाको शव भेटिएको हो । शव पोस्टमार्टमका लागि पोखराको पश्चिमाञ्चल क्षेत्रीय अस्पतालमा राखिएको छ । दुर्घटनाको पहिलो दिन ६३ र दोस्रो दिन सोमबार सात जना र मङ्गलबार एक जनाको गरी ७१ जनाको शव फेला परेको थियो । अब एक जनाको मात्र अवस्था थाहा हुन सकेको छैन ।