अण्डाको भाउ बढ्यो, क्रेटको कति ?

१ वैशाख, काठमाडौं । बजारमा माग बढेको तर उत्पादन घटेको भन्दै लेयर्स कुखुरापालक संघले अण्डाको मूल्य बढाएको छ ।

संघले आज सोमबारदेखि लागु हुने गरी नयाँ मूल्यसूची निर्धारण गरेको हो । अब फारममै ठूलो अण्डाको मूल्य प्रतिक्रेट (३० वटा) ४ सय ६५ रुपैयाँ पुगेको छ । यसअघि ४ सय ५० रुपैयाँमा बिक्री हुँदै आएको ठूलो अण्डामा प्रतिक्रेट १५ रुपैयाँ बढाइएको हो ।

त्यसैगरी, यसअघि ४ सय रुपैयाँ पर्ने मध्यम साइजका अण्डाको मूल्य अब ४ सय १५ रुपैयाँ कायम भएको छ । संघ अध्यक्ष विनोद पोखरेलका अनुसार गर्मी मौसम र कुखुरामा देखिएको रोगका कारण पछिल्लो समय अण्डा उत्पादन घटेको छ ।

साथै, सीमा नाकामा गरिएको कडाइका कारण बाहिरबाट आउने अण्डाको आयात रोकिएकाले पनि बजारमा अण्डाको मूल्य बढ्न गएको उनको भनाइ छ । ‘नयाँ वर्षको पूर्वसन्ध्यादेखि नै भएको पर्यटकीय चहलपहल र गतिविधि बढेका कारण अण्डाको माग बढेको छ,’ उनले भने ।

गत मंसिरमा अण्डाको मूल्य हालसम्मकै उच्च बिन्दुमा पुगेको थियो । त्यतिबेला ठूलो अण्डाको प्रतिक्रेट ५ सय ६५ र मझौलाको ५ सय ५० रुपैयाँ पुगेको थियो ।