राजस्वले खर्च धान्नै धौधौ - सरकारको आम्दानीभन्दा खर्च बढी, १० महिनामा ९ खर्ब आम्दानी हुँदा खर्च साढे ११ खर्ब माथि

सरकारी खर्चको तुलनामा मुलुकको कुल राजस्व संकलन कमजोर देखिएको छ । नेपाल राष्ट्र बैंकले महालेखा नियन्त्रक कार्यालयबाट समेत तथ्यांक लिएर सार्वजनिक गरेको देशको वर्तमान आर्थिक तथा वित्तीय स्थितिसम्बन्धी चालू आर्थिक वर्षको १० महिनाको प्रतिवेदनअनुसार चालू आर्थिक वर्ष २०८२/०८३ को वैशाख मसान्तसम्ममा सरकारी खर्चको तुलनामा राजस्व निकै कमजोर देखिएको हो ।

राष्ट्र बैंकका अनुसार चालू आवको १० महिनाको अवधिमा सरकारको कुल खर्च रकम ११ खर्ब ५७ अर्ब ८९ करोड पुगेको छ । यो खर्च यस अवधिको कुल राजस्व संकलनको तुलनामा दुई खर्ब रुपैयाँले कम हो । यस अवधिमा कुल राजस्व परिचालन नौ खर्ब २२ अर्ब ४३ करोड रहेको छ । राष्ट्र बैंकका अनुसार सरकारको कुल खर्चमध्ये चालू खर्च सबैभन्दा बढी अर्थात् सात खर्ब ७३ अर्ब २३ करोड रुपैयाँ रहेको छ भने पुँजीगत खर्च एक खर्ब २० अर्ब ३८ करोड तथा वित्तीय व्यवस्था खर्च दुई खर्ब ६४ अर्ब २९ करोड पुगेको छ । सरकारको कुल खर्च तथा राजस्व संकलनबीचको यो अन्तरले सरकारी बजेटको निकै ठूलो हिस्सा नियमित प्रशासनिक तथा दायित्व व्यवस्थापनमा खर्च भएको देखिएको छ ।