आँधीखोला गाउँपालिकालाई प्रशासनको अंकुश

स्याङ्जा । आँधीखोला गाउँपालिकाले गैरकानुनीरूपले उठाउँदै आएको पटके करमा जिल्ला प्रशासन कार्यालय स्याङ्जाले अंकुश लगाइदिएको छ । प्रशासनले पत्र पठाउँदै यातायात व्यवसायीमार्फत उठाउँदै आएको पटकेकर गैरकानुनी भएकाले शुल्क नउठाउन भन्दै अंकुश लगाइदिएको हो । जिल्लाका ११ वटा पालिकामध्ये आँधीखोला गाउँपालिकाले मात्रै पटकेकर उठाउँदै आएको छ । जसले गर्दा गाउँपालिका गैरकानुनीरूपमा अगाडि बढेको छ भन्ने सन्देश दिएको प्रशासनको पत्राचारबाट बुझिन्छ ।

पटकपटक व्यवसायीबाट यो पटकेकर हटाउन आग्रह गरे पनि आँधीखोला गाउँपालिकाका अध्यक्ष विश्व पौडेलले नसुनेको बताइएको छ । कानुनविपरीत पटकेकर उठाउने कार्यलाई अध्यक्ष पौडेलले नरोकेपछि व्यवसायीले जिल्ला प्रशासन कार्यालयमा उजुरी दिएका थिए । उजुरीको छानबिनपछि गाउँपालिकाले उठाउँदै आएको सवारी पटकेकर कानुन सम्मत नभएको भन्दै प्रशासनले पत्राचार गरेर तत्काल शुल्क नउठाउन अंकुश लगाएको हो ।