पाकिस्तानको क्वेटामा बम विस्फोट, दुई प्रहरीसहित चार जनाको मृत्यु

बलुचिस्तान । पाकिस्तानको दक्षिणपूर्वी प्रान्त बलुचिस्तानको क्वेटामा भएको बम विस्फोटमा परी कम्तीमा चार जनाको मृत्यु भएको छ भने १५ जना घाइते भएका छन् । समाचार एजेन्सी एएफपीका अनुसार क्वेटाको व्यस्त बजारमा रहेको प्रहरीको गाडीलाई निशाना बनाइएको थियो।

प्रहरी अधिकारी अजफर मेहसारले एएफपीलाई भने, ‘प्रारम्भिक अनुसन्धानले मोटरसाइकलमा राखिएको आईईडीले विस्फोट गराएको र त्यसलाई विस्फोट गर्नको लागि रिमोट कन्ट्रोलको प्रयोग गरिएको देखाएको छ।’ मृत्यु हुनेमा दुई प्रहरी र एक पाँच वर्षीया बालिका रहेका छन् । हालसम्म आक्रमणको जिम्मेवारी कुनै पनि संगठनले लिएको छैन ।