बिहारको नयाँ मन्त्रिपरिषद्: तीन महिला र एक मुस्लिम मन्त्री सहित नीतीश कुमारको दसौँ कार्यकालको सुरुवात

काठमाडौँ । बिहारका मुख्यमन्त्री नीतीश कुमारले बिहीबार दशौँ पटक पद तथा गोपनीयताको शपथ लिएसँगै २६ मन्त्री सहित नयाँ सरकार गठन गरेका छन्। नयाँ मन्त्रिपरिषद्मा तीन महिला र एक मुस्लिम प्रतिनिधिको समावेश भएपछि राज्यको समावेशी राजनीतिक संरचनातर्फको प्रयासलाई थप सुदृढ भएको रुपमा हेरिएको छ।

नयाँ सरकारमा समावेश तीन महिला मन्त्रीहरूमा लेशी सिंह, रमा निषाद र श्रेयसी सिंह आफ्ना–आफ्नै क्षेत्रमा प्रभावशाली राजनीतिक तथा सार्वजनिक परिचय राख्ने व्यक्तित्व हुन्। जेडीयूकी लेशी सिंह धमदाहा क्षेत्रमा वर्षौँदेखि लोकप्रिय नेता हुन् । २००० यता लगातार छ पटक चुनाव जित्दै आएकी उनी यसअघि खाद्य तथा उपभोक्ता संरक्षण मन्त्रीको जिम्मेवारीसमेत सम्हालिसकेकी छन्।