अख्तियारले समात्यो २७ लाख घूसको बिटो – नगद र चेकसहित दुई पक्राउ

काठमाडौं । अख्तियार दुरुपयोग अनुसन्धान आयोगले संघीय राजधानी काठमाडौंमा नै २७ लाखभन्दा बढी नगद र चेक र घूसको बिटोसहित २ जनालाई पक्राउ गरेको छ । पक्राउ पर्नेमा काठमाडौंस्थित नापी कार्यालय मनमैंजुका सर्वेक्षक रमेश उपरकोटी र उनीसँग सेटिङ गर्ने लेखापढी व्यवसायी अभिषेक कार्की रहेको अख्तियारले जनाएको छ ।

जग्गाको कित्ताकाट गर्ने क्रममा सेवाग्राहीसँग घूस मागिरहेको भन्ने सूचनाका आधारमा अख्तियारले मंगलबार गरेको स्टिङ अप्रेसनमा घूसको बिटोसहित उनीहरु फेला परेको अख्तियारका प्रवक्ता भोला दाहालले जानकारी दिनुभयो । उनीहरुलाई नियन्त्रणमा लिई थप अनुसन्धान थालिएको प्रवक्ता दाहालले बताउनुभयो ।