टि–ट्वान्टी लिगको स्पट फिक्सिङमा दुई समूह संलग्न

काठमाडौँ । नेपाल टि–ट्वान्टी क्रिकेट लिगको स्पट फिक्सिङ गराउन दुई वटा समूहको संलग्नता रहेको प्रहरीको केन्द्रीय अनुसन्धान ब्युरोको निष्कर्ष छ । ब्युरोका डिएसपी सुन्दर तिवारी सहित ५ जनाको छानविन समितिले पूर्व राष्ट्रिय खेलाडी मेहबुव आलम सहित दुई वटा टिमले ‘स्पट फिक्सिङ’ गराएको प्रतिवेदन बुझाएका छन् ।

प्रतिवेदनका आधारमा प्रहरीले माघ ९ मा पूर्व राष्ट्रिय क्रिकेटर मेहबुव आलम र राष्ट्रिय क्रिकेट टोलीका सदस्य आदिल अन्सारीलाई पक्राउ गरेको थियो । अन्सारीले भर्खरै सम्पन्न लिगमा फिक्सिङ खेलेको ब्युरोको निष्कर्ष छ । फिक्सिङमा क्रिकेटर अन्सारीसहित नेपालका ४ जना संलग्न छन् । टी–ट्वान्टी लिग क्रिकेटको व्यवस्थापन गर्ने जिम्मा लिएको कम्पनी सेभेन–३ स्पोर्टको व्यवस्थापक मध्येका ४ जना स्पट फिक्सिङमा संलग्न देखिएका छन् । लिगमा सहभागी विदेशी खेलाडी एक जना र अर्का एक जना बिचौलिया संलग्न देखिएको केन्द्रीय अनुसन्धान ब्युरोका एसपी सञ्जय सिंह थापाले बताए ।