उच्च प्रिमियम मूल्यसहित आईपीओ खोलेको घोराही सिमेन्ट शंकाको घेरामा- स्थानीयवासीद्वारा बहिष्कार, बोर्डको भूमिका रहस्यमय

काठमाडौं । विभिन्न काण्डमा मुछिएको घोराही सिमेन्ट इन्डस्ट्रीले उद्योग प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीका लागि जारी गरेको साधारण सेयर (आईपीओ)प्रति लगानीकर्ताको न्यून चासो देखिएको छ । मंगलबारदेखि बिक्री खुल्ला गरिएको कम्पनीको आईपीओ स्थानीयवासीबाट बहिष्कारजस्तै छ । वैदेशिक रोजगारी तर्फबाट पनि तीन दिनको अवधिमा पर्याप्त आवेदन नपरेको स्रोतले नेपाल समाचारपत्रलाई जानकारी दियो ।

वातावरण प्रदूषणको सन्दर्भमा स्थानीयबासीसँग भएको विवाद अदालतसम्म पुगेको छ । उद्योगले बिजुली खपत गरेबापतको करिब एक अर्ब रुपियाँ नेपाल विद्युत् प्राधिकरणलाई महसुल नतिरेर बक्यौता नतिर्न दाउपेज खेलिरहेको छ । छिमेकी उद्योग रोल्पा सिमेन्ट उद्योगको स्वामित्वमा रहेको चुनढुंगा खानी क्षेत्रमा बाटो बनाउने नाममा ९ हजार टिपर चुनढुंगा चोरी गरेको आरोप छ । घोराही सिमेन्ट उद्योगको उत्पादन सगरमाथा ब्रान्डको ओपीसी सिमेन्ट नापतौल तथा गुणस्तर विभागमा परीक्षण गर्दा कैफियत देखिएकाले जिल्ला प्रशासन कार्यालय बर्दियाले बिक्री वितरणमा रोक लगाएको जस्ता विवादका बीच कम्पनीले उच्च प्रिमियम मूल्य थप गरी आईपीओ जारी गरेको थियो ।