तरकारी खेती र स्वरोजगारमार्फत आत्मनिर्भर बन्दै रौतहटका महिला

रौतहट । रौतहट जिल्लाका विभिन्न स्थानीय तहका महिलाहरू व्यावसायिक कृषि, पशुपालन र साना उद्यममार्फत आत्मनिर्भर बन्दै गएका छन् । ग्रामीण विकास केन्द्र नेपालद्वारा सञ्चालन गरिएको लैङ्गिक हिंसा न्यूनीकरण तथा सामाजिक–आर्थिक सशक्तिकरण परियोजनाले उनीहरूको जीवनस्तर सुधारमा महत्वपूर्ण भूमिका खेलेको देखिएको छ ।

चन्द्रपुर नगरपालिका–७ बनबहुअरीकी दुखनी थरुनीले करिब पाँच कठ्ठा जमिनमा लौका, करेला, घिरौला लगायतका तरकारी खेती गर्दै दैनिक १५ सयदेखि २ हजार रुपैयाँसम्म आम्दानी गर्दै आएकी छन् । उत्पादन भएको तरकारी बारीबाटै बिक्री गर्नुका साथै स्थानीय हाटबजारमा समेत बिक्री गर्ने गरेकी उनले यसले आफ्नो परिवार आर्थिक रूपमा सबल बन्दै गएको बताइन् ।