गाडी चढेर गन्तव्य कहिले पुगिएला ?

देशका कुनाकन्दरासम्म जोड्ने सडकको हविगत उस्तै छ। कुनै निर्माण सम्पन्न नभई अलपत्र छन्। कुनै विस्तारका नाममा भत्काइएका छन्। कुनैमा पिच थोत्रो भएर खाल्डै खाल्डा परेका छन्। सुक्खायाममा बुङबुङती धुलो र झरीमा हिलाम्य हुनु नौलो कुरै रहेन।

संघीय राजधानी काठमाडौं पुग्ने प्रायः सडक कि बिग्रिएका छन् कि त बिगारिएका। गण्डकीको प्रदेश राजधानी रहेको पोखरा पुग्ने सडकमार्ग छिचोल्नै हम्मेहम्मे पर्छ। लुम्बिनी प्रदेशको राजधानी बुटवल जाने नारायणघाट–बुटवल सडकखण्ड विस्तारको नाममा यात्रुले सास्ती खेपेको वर्षौं भइसक्यो।