अवैध ओसार–पसारमा संलग्न सवारी नियन्त्रणमा

नवलपुर प्रहरीले नदीजन्य पदार्थको अवैध ओसार–पसारमा संलग्न चारवटा सवारी साधनलाई नियन्त्रणमा लिएर कारबाहीका लागि सम्बन्धित स्थानीय तहमा पठाएको छ ।

जिल्ला प्रहरी कार्यालय नवलपुरका सूचना अधिकारी प्रहरी नायव उपरीक्षक अनिल पण्डितका अनुसार विनयी त्रिवेणी गाउँपालिका –२ ज्यामिरे क्षेत्रबाट लु २ ख ५०९३ र लु २ ख ६०२० नम्बरको ट्रक नियन्त्रणमा लिएको हो । मध्यविन्दु नगरपालिका –१० बाट प्र ३–००१ ख ०२५८ र लु २ ख ३५२७ नम्बरको सवारी साधनलाई नियन्त्रणमा लिइएको हो ।

अवैध रूपमा ढुङ्गा, गिटी तथा बालुवा उत्खनन्, बिक्री र व्यवस्थापन सम्बन्धी मापदण्ड विपरीत सडकमा पानी चुहाउँदै सामग्री ओसारपसार गरिरहेका सवारी साधनलाई प्रहरी चेकिङ टोलीले नियन्त्रणमा लिएर कारबाहीका लागि सम्बन्धित स्थानीय तहमा पठाएको पण्डितले बताउनुभयो ।

प्रहरीले नदीजन्य पदार्थको अवैध उत्खनन् तथा ओसारपसार नियन्त्रणका लागि निगरानी र चेकजाँचलाई थप कडाइ गरेको उहाँको भनाइ छ ।